As metodoloxías son unha peza clave do Sistema Voluntario de Créditos de Carbono da Xunta de Galicia (SVCC). A súa función é establecer os criterios técnicos que deberán seguir os proxectos para calcular, validar e verificar a absorción de carbono ou a redución de emisións dentro do sistema.
Dito de forma sinxela: unha metodoloxía define como se mide, como se comproba e baixo que condicións un proxecto pode xerar créditos de carbono.
Cada proxecto que queira participar no SVCC deberá aplicar unha metodoloxía aprobada, o que achega rigor, trazabilidade e confianza tanto a quen xera créditos como a quen desexa adquirilos para compensar voluntariamente as súas emisións.
O Comité Técnico, actuando de oficio, ou calquera persoa interesada mediante o modelo PR004A poden presentar unha proposta de metodoloxía. Cando isto ocorre, iníciase o procedemento de tramitación, que consta dos seguintes pasos:
Exposición pública
A proposta de metodoloxía sométese a exposición pública na Plataforma durante un mínimo de 20 días.
En tramitación
Tras a exposición pública, o Comité Técnico estuda e completa a metodoloxía, tendo en conta as observacións recibidas e podendo contar con apoio externo especializado. A continuación, emite unha proposta de aprobación e a consellería competente elévaa ao Consello da Xunta.
Aprobada e publicada
Unha vez aprobada polo Consello da Xunta, incorpórase á listaxe de metodoloxías elixibles e ao repositorio de documentación técnica da Plataforma.
Unha metodoloxía xa aprobada e publicada poderá ser revisada e actualizada, seguindo o mesmo procedemento que para a súa validación, ou mesmo revogada, dándose de baixa por acordo do Consello da Xunta.
O Sistema Voluntario de Créditos de Carbono da Xunta de Galicia traballa actualmente en dúas primeiras liñas metodolóxicas. O seu desenvolvemento deberá seguir os procedementos previstos dentro do SVCC antes de que poidan aplicarse a proxectos concretos.
Esta liña de traballo céntrase no almacenamento de carbono en produtos de madeira destinados á construción en Galicia.
O seu desenvolvemento permitirá avanzar na definición de criterios para valorar o papel que determinados produtos de madeira poden ter como forma de almacenamento de carbono dentro do sistema.
Nesta fase, a liña preséntase unicamente como unha metodoloxía en desenvolvemento. Aínda non implica a súa aprobación nin a súa dispoñibilidade para a certificación de proxectos.
Esta liña de traballo céntrase na xestión forestal mellorada por alongamento de quendas en Galicia.
O obxectivo é avanzar en criterios que permitan analizar as absorcións de carbono vinculadas a prácticas de xestión forestal mellorada, dentro do marco do Sistema Voluntario de Créditos de Carbono da Xunta de Galicia.
Nesta fase, a liña preséntase unicamente como unha metodoloxía en desenvolvemento. Aínda non implica a súa aprobación nin a súa dispoñibilidade para a certificación de proxectos.
As metodoloxías son documentos técnicos que requiren revisión, validación e aprobación antes de poder aplicarse dentro do sistema. Por ese motivo, esta páxina ofrece unicamente información xeral sobre as primeiras liñas de traballo metodolóxico identificadas ata o momento.
Cando existan metodoloxías aprobadas, publicarase a información correspondente nesta páxina e nas canles oficiais do Sistema Voluntario de Créditos de Carbono da Xunta de Galicia.
