A Consellería de Medio Ambiente e Cambio Climático abriu unha convocatoria de Manifestación de Interese (MdI) entre o 12 de novembro e o 12 de decembro de 2025, co obxectivo de avanzar na posta en marcha do Sistema voluntario de créditos de carbono de Galicia e na folla de ruta que permitirá aprobar as primeiras metodoloxías e inscribir proxectos galegos de absorción ou redución de carbono.

Esta iniciativa tivo como finalidade identificar as tipoloxías de actividades sobre as que comezar a traballar, así como definir os sectores prioritarios nos que a Xunta de Galicia debe focalizarse para a aprobación das primeiras metodoloxías do sistema e, posteriormente, poder recibir proxectos para a súa inscrición no rexistro e incorporación ao sistema.

Como resultado da MdI, recibíronse 37 achegas de colexios profesionais oficiais, clústeres, empresas e particulares de diversos sectores, como o forestal, agrícola-gandeiro, marítimo-pesqueiro, xestión de residuos e enerxía, o que pon de manifesto o alto interese no desenvolvemento deste mercado e a transversalidade deste sistema.